इण्डिआना राज्यमा क्षमादानका लागि गरिएको अन्तिम समयको अनुरोधलाई सर्वोच्च अदालतले अस्वीकार गरेपछि मृत्युदण्डको सजाय पर्खिरहेका ब्रान्डन बर्नार्डको सजाय कार्यान्वयन गर्दै उनलाई मृत्युदण्ड दिइएको छ ।
चालिस वर्षका बर्नार्डलाई सन् १९९९ मा उनी किशोर अवस्थामा छँदा नै हत्याको अभियोगमा दोषी ठहर गरेर सजाय सुनाइएको थियो र उनी झण्डै सत्तरी वर्षयता संघीय सरकारले मृत्युदण्ड कार्यान्वयन गरेको सबैभन्दा कम उमेरका दोषी हुन् ।
बिहीवार विषको इन्जेक्सनबाट मृत्यु वरण गर्नुअघि उनले आफूले हत्या गरेको जोडीका परिवारसमक्ष क्षमायाचना गरेका थिए । उनले तीन मिनेटसम्म बोलेर आफ्नो अन्तिम भावना अभिव्यक्त गरेका थिए ।
उनलाई मृत्युदण्ड दिने समय निर्धारित समयभन्दा दुई घण्टा ढिलो भएको थियो। उनका वकिलहरूले अन्तिम समयसम्म पनि सजाय कार्यान्वयन रोक्न सर्वोच्च अदालतमा निवेदन दिएका थिए जुन सफल हुन सकेन । अफ्रिकी अमेरिकी मूलका ती व्यक्ति दुईजना गोरा जोडी टेड र स्टेसी बाग्लीलाई अपहरण गरेर लुटपाट गरेको र ज्यान मारेको अभियोग लागेका पाँचजनाको समूहका एक सदस्य थिए।
अमेरिकामा राष्ट्रपति डोनल्ड ट्रम्पको कार्यकाल समाप्त हुनु अघि अझै थप चारवटा मृत्युदण्डको सजाय कार्यान्वयन गर्ने योजना रहेको छ।
यदि मृत्युदण्डको सबै पाँचवटै सजाय कार्यान्वयन भएमा एक शताब्दीयता सबैभन्दा धेरै मृत्युदण्ड कार्यान्वयन भएको कार्यकाल राष्ट्रपति ट्रम्पको हुनेछ ।
बर्नार्डलाई सुनाइएको मृत्युदण्डको सजाय कार्यान्वयन नगर्न हजारौँ मानिसहरूले राष्ट्रपति ट्रम्प समक्ष आग्रह गरेका थिए।
सिनेटरहरू रिचर्ड जे डर्बिन, क्वोरी ब्रुुकरका साथै रियालिटी टेलिभिजन स्टार किम कार्डाशिअन वेस्ट लगायतका व्यक्तित्वहरूले पनि अन्तिम समयसम्म मृत्युदण्ड रद्द गर्न आह्वान गरेका थिए।