चीनमा निर्मित कोभिड खोपको प्रभावकारिता कम

Spread the love

चीनका प्रमुख रोग नियन्त्रण अधिकारीले चीनमा निर्मित कोभिड खोपहरूको प्रभावकारिता कम भएको बताएका छन् । पत्रकार सम्मेलनमा चीनका रोग नियन्त्रण केन्द्रका प्रमुख ग्वाओ फूले प्रभावकारिता वृद्धि गर्नका लागि खोपहरूको सम्मिश्रण बनाउने विषयमा सोचिएको जानकारी दिएका छन् । नेपालमा पनि चीनले अनुदानमा दिएको आठ लाख मात्रा कोभिड खोप अहिले लगाउन थालिएको छ ।

चीनले चार प्रकारका खोपहरूलाई स्वीकृति दिएको छ जसमध्ये विदेशमा गरिएको परीक्षणमा केही खोपको प्रभावकारिता ५० प्रतिशतसम्म पनि देखिएको छ । पत्रकार सम्मेलनमा राखेको आफ्नो भनाइलाई गलत व्याख्या गरिएको उनले बताएका छन् ।

चीनमा १० करोडभन्दा बढी मानिसले स्वदेशमा निर्मित खोपको कम्तीमा एक मात्रा लगाएका छन् । चिनियाँ सरकारले भने आफ्ना खोपहरू प्रभावकारी भएको र चिनियाँ खोप लगाएका विदेशीलाई मात्रै चीन प्रवेशाज्ञा दिने बताउँदै आएको छ ।

चीनका रोग नियन्त्रण केन्द्रका प्रमुख ग्वाओ फुले शनिवार हाल उपलब्ध खोपहरूको सुरक्षा दर उच्च नरहेको बताएका थिए । उनले प्रभावकारिता वृद्धि गर्नका लागि खोपहरू मिसाउने विषयमा विचार गरिएको सङ्केत गरेका छन् । उनले खोपको प्रभावकारिता वृद्धि गर्न मात्राको सङ्ख्या परिवर्तन गर्ने र दुई मात्राबीच समयावधि बढाउने जस्ता चरणहरूको चर्चा गरेका थिए ।

तर पछि उनले सरकारी पत्रिका ग्लोबल टाइम्सलाई ‘संसारभरिका खोपहरूको सुरक्षा दर कुनै बेला कम र कुनै बेला बढी हुने’ बताए । उनले तिनीहरूको प्रभावकारिता कसरी बढाउने भन्नेबारे संसारभरिका वैज्ञानिकहरूले सोच्नुपर्ने बताए ।

उनले चिनियाँ खोपहरूको प्रभावकारिता कम भएको आफ्नो भनाइबारे त्यो ‘पूर्ण रूपमा गलत व्याख्या’ भएको बताए । गाउका दुवै भनाइहरूलाई चिनियाँ सञ्चारमाध्यमहरूले खासै स्थान दिएका छैनन् ।

तर सामाजिक सञ्जालमा भने उनको पहिलो भनाइको आलोचना भएको छ । केही मानिसले उनलाई चुप लाग्न सुझाव दिएका छन् । अन्तर्राष्ट्रिय रूपमा कम तथ्याङ्क भएका कारण चिनियाँ खोपको प्रभावकारिताको विषय लामो समयदेखि अस्पष्ट छ । ब्रजिलमा गरिएको परीक्षणमा चीनको सिनोभ्याकको प्रभावकारिता ५०.४ प्रतिशत देखिएको थियो। त्यो विश्व स्वास्थ्य सङ्गठनले स्वीकृति प्रदान गर्न आवश्यक ५० प्रतिशतभन्दा अलिकतिले मात्र बढी हो ।

टर्की र इन्डोनेशियाका अन्तरिम तथ्याङ्कहरूले भने उक्त खोपको प्रभावकारिता ९१ देखि ६५ प्रतिशत देखाएका छन् । पश्चिमा देशहरूमा उत्पादित फाइजर, मोर्डेर्ना र आस्ट्राजेनेका सबै खोपको प्रभावकारिता ९० प्रतिशत वा अझ बढी छ ।

 

HT

Leave a Reply

Your email address will not be published. Required fields are marked *

Next Post

राष्ट्रिय सहमतिका लागि पहल गर्न प्रधानमन्त्रीलाई प्रदीप गिरीको आग्रह

२०७७ चैत्र ३०, सोमबार १२:५०
Spread the loveकाठमाडौं । नेपाली कांग्रेसका सांसद प्रदीप गिरीले प्रधानमन्त्री केपी शर्मा ओलीलाई बालहठ त्यागेर राष्ट्रिय सहमतिका लागि पहल गर्न आग्रह गरेका छन् । सोमबारको प्रतिनिधिसभा बैठकमा बोल्दै सांसद गिरीले नेपाली राजनीतिमा नयाँ उचाई प्राप्त गर्न राष्ट्रिय सहमतिको लागि पहल गर्न प्रधानमन्त्रीलाई आग्रह गरेका हुन् । उनले भने, ‘म भन्छु […]