संयुक्त राष्ट्रसङ्घका मध्यपूर्व शान्ति दूतले इजरायल तथा प्यालेस्टीनी विद्रोहीबीच गाजामा चर्किरहेको सङ्घर्षले अवस्थालाई पूर्ण युद्धतर्फ धकेलिरहेको चेतावनी दिएका छन् । चर्किएको हिंसापश्चात् टोर वेन्स्ल्यान्डले उक्त टिप्पणी गरेका हुन् ।
इजरायल तथा प्यालेस्टाइनबीच तनाव चर्कँदै गर्दा विद्रोहीहरूले इजरायली सहर तेल अभिभमा रकेट हमला गरेका छन् । इजरायलले हवाई हमला गरेर गाजा क्षेत्रमा एउटा भवन ध्वस्त पारिदिएको बताइएको छ । गाजामा एउटा भवन परिसर ध्वस्त पारिएपछि प्यालेस्टिनी विद्रोहीहरूले इजरायली शहर तेल अभिभमा १३० वटा क्षेप्यास्त्र प्रहार गरेको बताएका छन् ।
भवनमा बसिरहेका मानिसहरू तथा स्थानीय बासिन्दालाई त्यहाँबाट अन्यत्र जान चेतावनी दिएको डेढ घण्टापछि गाजास्थित १३ तले भवनमा हमला गरिएको रोयटर्स समाचारसंस्थाले जनाएको छ । इजरायली सेनाका अनुसार विद्रोहीहरूले यसअघि गरेका रकेट हमलाको बदला स्वरूप उक्त भवनमा हमला गरिएको हो ।
वर्षौँयता भएका यी सबैभन्दा खराब हमलाहरूमा कम्तीमा ३१ जनाको ज्यान गइसकेको बताइएको छ । अन्तर्राष्ट्रिय समुदायले दुवै पक्षलाई तनाव अन्त्य गर्न आह्वान गरिरहेका छन् । विद्रोहीहरूले जेरुसलेम तथा अन्य क्षेत्रमा गरी सयौँ रकेट प्रहार गरिसकेका छन् ।
इजरायली क्षेत्रमा तीन जनाको ज्यान गएको छ भने प्यालेस्टिनी क्षेत्रमा २८ जनाको निधन भइसकेको छ । इजरायली प्रधानमन्त्री बेन्जामिन नेतान्याहुले वर्षौँयता पहिलो पटक जेरुसलेममा रकेट प्रहार गरेर विद्रोही समूह हमासले लक्ष्मणरेखा नाघेको आरोप लगाएका थिए ।
गाजाको नियन्त्रण गरिरहेको हमासले चाहिँ जेरुसलेमस्थित अल अक्सा मस्जिदलाई ’इजरायलको ज्यादती तथा आतङ्कबाट रक्षा गर्न’ उसले कारबाही गरिरहेको बताएको छ । उक्त स्थल मुस्लिम तथा यहुदी दुवैका निम्ति पवित्र मानिन्छ ।
त्यहाँ सोमबार भएका झडपमा सयौँ घाइते भएका थिए । गत केही दिनमा सन् २०१७ यता जेरुसलेममा सबैभन्दा खराब हिंसा भइरहेका छन् । अधिनस्थ पूर्वी जेरुसलेमबाट यहुदी बासिन्दाले आफ्ना परिवारलाई विस्थापित गर्न खोजेको प्रति प्यालेस्टीनीहरूमा तीव्र आक्रोश फैलिएको थियो ।