सन् २०१५ मा फ्रान्सको राजधानी पेरिसमा भएको आक्रमणको एक मात्र जीवित आक्रमणकारीलाई अदालतले आतङ्कवाद र हत्याको आरोपमा दोषी ठहर गरेको छ । एक सय ३० जना मानिसको ज्यान गएको उक्त घटनाका लागि सलाह अब्दस्लामलाई दुर्लभ किसिमको पूर्ण आजीवन कैदको सजाय सुनाइएको छ ।
अदालतले आक्रमणमा संलग्न मृत छ जनासहित १९ जनालाई दोषी ठहर गरेको छ । घटनाबारे फ्रान्सको आधुनिक इतिहासमा सबैभन्दा ठूलो सुनुवाइ गत सेप्टेम्बरमा सुरु भएको थियो । दोस्रो विश्वयुद्धपछि फ्रान्समा भएको सबैभन्दा ठूलो हमलाबारे बुझ्न नौ महिनाभन्दा लामो समय पीडित, पत्रकार र मृतकका परिवार प्यारिसमा विशेष रूपले निर्मित अदालतबाहिर उपस्थित भएका थिए ।
सन् २०१५ को नोभेम्बर १३ मा पेरिसका बार र रेस्टुराँहरू, राष्ट्रिय फुटबल रङ्गशाला र साङ्गीतिक स्थलमा भएका आक्रमणहरूमा सयौँ अन्य व्यक्ति पनि घाइते भएका थिए । सुनुवाइ सुरु हुँदा सलाहअब्दस्लामले आफूलाई इस्लामिक स्टेट समूहको सैनिक भएको बताउँदै विद्रोही भावमा प्रस्तुत भएका थिए ।
तर पछि अब्दस्लामले पीडितहरूसँग माफी माग्दै अदालतलाई आफ्नो अन्तिम जवाफमा आफू हत्यारा नभएको भन्दै आफूलाई हत्यारा ठहर गर्नु अन्याय हुने बताएका थिए । सुनुवाइको समयमा उनले आफूले लगाएको आत्मघाती बम नपड्काएको र सहरबाहिर फ्यालेको दाबी गरेका थिए ।
उनको पूर्ण आजीवन कैदको अर्थ ३० वर्षपछि पनि उनी जेलबाहिर हुने सम्भावना ज्यादै न्यून छ । फ्रान्समा अपराधीलाई दिइने यो सबैभन्दा कडा सजाय हो र अदालतले विरलै यो सजाय सुनाएको इतिहास छ।
