परमादेश नभएको भए उहाँ र हामी सँगसँगै काम गर्न नै पाउँदैनथ्यौं : प्रधानमन्त्री

काठमाडौं । प्रधानमन्त्री शेरबहादुर देउवाले प्रतिनिधिसभाको पुनर्स्थापना गरेर न्यायालयले न्याय गरेको बताएका छन् । प्रतिनिधिसभाको अन्तिम बैठकमा समापन मन्तव्य राख्दै प्रधानमन्त्री देउवाले पुनर्स्थापित संसद्बाट जनताको पक्षमा काम गर्न सकिएको बताएका हुन् ।

उनले भने,‘ हुन त प्रतिपक्षी दलको नेताले संसद नै परमादेशको सरकार भन्नु हुनेछ । जहाँ उहाँ र हामी सँगै काम गर्न पाइरहेका छौं । परमादेश नभएको भए उहाँ र हामी सँगसँगै काम गर्न नै पाउँदैनथ्यौं, धेरै ठूलाठूला विधेयकहरु पास गर्न नै पाउँदैनथ्यौं।’

उनले मंसिर ४ गतेको निर्वाचन निष्पक्ष र शान्तिपूर्ण रुपमा गर्न निर्वाचन आयोगलाई सरकारको पूर्ण सहयोगको प्रतिबद्धता पनि व्यक्त गरे । उनले प्रतिनिधिसभाको पाँचवर्षे कार्यकाल उपलब्धिपूर्ण रहेको महसुस भएको बताए। त्यसका लागि सबै दलले खेलेको भूमिकाप्रति आभार प्रकट गरे ।