काठमाडौं । नेपालले आईसीसी महिला टी–२० विश्वकप एसिया छनोटमा बहराइनलाई ९ विकेटले पराजित गरेको छ । थाइल्यान्डको तेरथाइ क्रिकेट मैदानमा शनिबार भएको खेलमा नेपालले बहराइनलाई ९ विकेटले पराजित गरेको हो ।
वर्षाले आउटफिल्डका कारण खेललाई ५ ओभरमा झारिएको थियो । टस हारेर पहिले ब्याटिङ गरेको बहराइनले ५ ओभरमा १ विकेटको क्षतिमा ४१ रन बनाएको थियो ।
बहराइनका लागि कप्तान दिपिका रंगासिकाले १३ बलमा आक्रमक ३४ रन बनाइन् । जवाफी ब्याटिङमा नेपालले लक्ष्य ४.२ ओभरमा १ विकेट गुमाउँदै सजिलै पूरा गर्यो । नेपालका लागि कविता कुँवरले १८ रनको योगदान दिइन् भने सम्झना खड्का १३ रन र कप्तान इन्दु बर्मा ७ रनमा अविजित रहिन् ।
यसअघि शुक्रबारको खेल वर्षाका कारण टस हुनै नसक्दा खेल रद्द भएको थियो। दुबै टोलीले १–१ अंक बाँडेका थिए । अब नेपालले मंगलबार हङकङसँग खेल्नेछ ।
