
काठमाडौं । संसदको महाअभियोग सिफारिस समितिले प्रधानन्यायाधीश चोलेन्द्रशमशेर जबराले बयानका क्रममा नाम लिएकाहरुसँग पनि बयान लिने भएको छ ।
समितिको मंगलबार बसेको बैठकले बुधबार जबराले बयानका क्रममा आरोप लगाएका वा पोलेका व्यक्तिहरुसँग छलफल गर्ने निर्णय गरेको हो ।
महाअभियोग सिफारिस समितिले पूर्वन्यायाधीश र नेपाल बार एशोसिएसनका पूर्व पदाधिकारीहरुलाई बोलाउने निर्णय गरेको समिति सदस्य मीन विश्वकर्माले जानकारी दिए ।
उनले भने, ‘जबराले महाअभियोगको बयानका क्रममा मुछेका वा पन्छाएका व्यक्तिहरुको पनि बोलाएर वास्तविकता के हो भनेर सोधिने छ । समय छैन । एकैदिन बोलाएर उहाँहरुले दिन चाहेको सूचनाहरु दिनको लागि बोलाइने छ ।’
आफूमाथि लागेको अभियोगबारे बयान दिने क्रममा जबराले सर्वोच्चका बहालवाला र पूर्वन्यायाधीश, बार एशोसिएसनका पूर्व पदाधिकारी, वरिष्ठ अधिवक्ताहरुलाई आरोपित गरेका थिए ।